February 30 (Part I)

March 21, 2014 8:21 pm0 commentsViews: 5

 February 30 
By- Bete Fala
images (2)Thihnak khamtlang ih ding au thawm cun, innsung hmuahhmuah a kuahkhat t’heh. Khawvang t’ih si awm tak ih, a aw neih hmuahhmuah suah ih t’ap aw leh, fapa te, fapa te ti aw a theih cun, a tha neih hmuah suah ih, thi le hnai tiang suak ih a hring tu naute nu cu, thihkhat ka luat ti hmel thawn lungawi aipuang ih khat mithmai te thawn a fapa te cu a von cawi.
Nauneih a kil tu nu pawl cun ” Nuthluai fapate ka neih le
“Van Lian Ce” ti’n a hmin ka sak ding na ti kha, zoh aw na fapa hi a hmin thawn a kaihawk dan ding hi, hi tluk naute hmeltha duhnung kan hmu hrih lo ti’n an zaten an lungawi tlang tuk.

Mi harsa te an si ruangah liante thlakhat a kim in, a nu cun mi inn ah a tan ih hna a t’uan san ringring. A fapa fimthiamnak nei mi si ter rori a duh ruangah a sur a sa ti lo’n hnat’uan ding um hmuahhmuh cu a t’uan t’heh.
Lian te khal kum thum a kim ve thlang ih, a nu cun mi inn ih tan ringring a hmasong ruangah a hna tuannak
( concrete) an khuai nakah a hruai ve ringring.
Liante cu nauhngak zawnlung leh felfai zet a si ruangah a nu’i hnat’uannak kiang te ah a rak to kerki t’heu. A it hmut can ah a nu in puan a phah sak ih, puan in a lu a khuh ih cutin leilung par ah a itthat t’heu. A fapa itthat lai a hmel a von zoh cuh, Nuthluai thinlung cu a puakkuai t’heh zik. Ka fa na nu san ka tlaih lo ruangah, na suncaw ah buh rang hman ka lo ken thei lo in ngaithiam hram aw maw Ti’n liante hmel te cu zoh phah in a mitthli cu an rong luang thlurthlo. Zanlam ni a tlak zik hrawng in an faten inn lam an pan t’heu.

Inn an thlen cun, meisa an muah ih, kimnga beel pi ih “vainimho”cu an zanriah ah an ti hlum ih, an thurhang leh cite thawn an nufa te’n thaw ti zet in an ei t’heu.
Liante cu angki paa leh bawngbi sia hniaphni te thawn a vak kerhko t’heu. Phanat hruk ding khal a nei lo. Kum nga a hong kim ve thlang cun, tlawng lut ding a si ve thlang ruangah an nu faten tlawng inn lam an pam ve. Saya/ sayamah pawl in liante pa hmin an von suh cuh, mithmai thim zet thawi ding nuthluai cun, pa a nei lo a hon ti ih lian te cu a nu hmin lawng in tlawng a up.

Tlawngfawm angki pakhat, bawngbi pakhat lawng a neih ruangah ruah ih a toih ciar can khal ah zan ah an nufa ten meisa ah an ro ter t’heu. Nuthluai cu sun ih a um dah lo ruangah liante cu suncaw a ken t’heu. Lainte hrang suncaw ding ah ti’n fangfai pikhat te a leisak ih buh leh ngapi rawh a ken t’heu. Lainte cu ziangvek rawl a ei khal ah a thaw lo tivek khal in a phun dah hrimhrim lo. Tlawnginn ih a rualpi pawl in nang farahfa pa nei lo, nitin na hmeh le ngapi rawh ti’n an zawntaih t’heu khal ah a hnaset a dun men hai. Tlawng t’um phah ah a nu’i hnat’uannak in a hngak ih an nufaten inn an tlung tlang t’heu.

Liante cu phunhrek te kaimi a si nan ca a duh zet. A man can ah ca ta rori a zoh.. electric sim lo meiinn hman an neih ve lo ruangah far vang tangah hmai dum mianmi te thawn ca a zoh t’heu.
Zarhte ni tlawng a kai lo can ah a nu’i hnat’uan nak ah cabu keng in a thlun t’heu. A nu’i hnatuan cu mitt’hep loin a zoh ringring. Liante cu a to nak ihsin a ding vukvi ih a nu hnen ah zamrangzet in a va feh ih a nu’i ken mi sobul cu a lon vukvi ih, “Nunu cawl aw keimah ka lo sawng ding a hon ti”.
Nuthluai ih thinlung cu a parh t’heh zik. “Van lian ce na tonak ihsin ding awla a tu rori ah na ca va zoh aw. Nang ih t’uan ding hna a si lo. Nangcu tlawngkai si na hna. Feh aw, feh zang, fehzang aw ka lo ti”, tin thinlung parh t’heh zik mitthli haal t’iamt’iam in liante cu a hon hro ciamco. Liante cun, a nu cutluk ih a thinheng cu a mang a bang tuk. Kum nga lenglo a si thlang a nu in mithmaisai khal in a zoh dah lo mi cuti mai ih a hon hro cu mak ti tuk cing in a cabu a lak ih ca a von zoh. Zanlam ni a liamzik thlang cun, Lainte ra kan tlungthlang ding ti’n cawi ding tin a kut a von pharh cuh, liante cun, a nu’i kut durh seksek thisuak a von hmuh cun, t’ong ngaih nak thei lo cun ninghang tuk in a t’ap thlurthlo. A nu cun, ka fa duat ca t’haten zir aw maw. Khah!! Ngam thlang aw ti’n liante’i mitthli cu a von hnulsak ih innlam an pan.

Nuthlui cu liante tlawngkainak ding ah a taksa ih a celhpaih lo tiang khal in sum a hlawh t’heu. A rilrawn tuk can khal ah hmuk pakhat te khal a lei ngam dah lo. Lainte khal tleirawl a hong si ve thlang. Tlawnginn ah a rualpi pawl in nang panei lo Van lian ce tiih an t’ongkhum nak cu a hnasung ah a cam tuk tlang. Tuzan cu ka pa zo a si ti ka nu ka sut thlang ding ti lungput a nei. Zanriah an khop ih liante cu ca zoh ding in far a hon vang.
“Nunu thu lo sut ding ka nei”
Ziang thu maw?
“Ka p,,,pa hi zo si? Khuinah a um? A dam lai maw?
Nuthluai cu A faar sah lai a cawl dukdi.
Lainte na ca kha t’haten zoh aw.
“Nu, cucu in sim lo ding tinak maw? Sim na hreh tuk a siah cu ka lo nawr lo. Ti’n riahsia zet in a vong um.
Ka fa liante, pa nei lo a si ruangah na rualpi pawl zawntaih na tuar ti ka thei tuk. Kei na nu hi leitlunah raksuak ve hlah sehla nang hiti vek in farah ,rethei,zonziah na tuar t’ul lo ding nan sikhawh. In ngaithiam hram aw. Ka fa, ca thiammi si rori tum aw maw. Tin nuthluai cu a mitthli an tlak duahdo. Lainte cun Nunu, inngaihthiam aw keimah mawh si ka pa thuhla tla ka lo sut nawn lo ding. Ca thiammi fapa si ter I duh vek in, Nunu, ca ka zuam ding ih na duhthusam ka lo kim ter tengteng ding ti ka lo tiam.
Khah!!! Hni awle ti’n liante cun a nu cu a vom pawm.
Ka fa, nangvek fapa ka rak lo hrin hi ka lungawi tuk. Pathianzarah kan dam ding ih phurhra na t’heh zan rori ah na pa thuhla ka lo sim t’heh ding ti ka lo tiam ve. Khah! Na ca va zoh ve thlang aw le.

Liante cu phun nga a kai in phun kua tiang 1st lole 2nd a ngah ringring. A sinan a nu in phurhra boder ih um lo cu a duh hrimhrim lo.
“Nunu, a leng in phurhra tla ka kai men ding ca ka neh ko a ti nan a nu in a duh cuang lo ruangah liante cu Border um ding in tim tuah. Nunu, a sile ka um lo sungah rawl t’ha ten ron ei aw maw. Na celhpaih lole hna tla ron t’uan hlah. Cun, na dam lo veten sibawi hnen ah rak feh aw. Tlawng ka t’heh zangzang dingih keimah nih ka lo cawm thlang ding. Nu damten rong um tum aw maw tin thu a cah rero. Si ee,,, nangtla dam ten um awla na ca leh pathian kha a hmaisabik ah ret veve aw tin liante ih lupar ah a kutsuang in thla acam sak.
Liante border a luh zaan cuh, nuthluai cu ti lo rawl lo leh it khal itthat thei loin a um. A fapa mithi zun ngai rorin a ngai duahdo. Liante a suah pek ihsin border alut hlan deuh tiang ihkhun pakhat ih ittlang an si ih, tuzan a mah lawng ti riahri tei a von ih cu a lungleng a tuar lo. An inn cu di in sia tak te, furcan ah tla cun an ihkhun tlunkhal in ruah an rong dok t’heu. Inn fate tak a si nan, liante a um nawn lo cun, milian inn sung kau deldel, bawlung sitnak khal ih hman theih khop ih kau sung ih mahlawng um vek rorin a thei aw.
Liante khal a nu a ngai tuk ve. Thlacamnak ah an hngilh aw dah lo an nufa ten.

Nuthlaui cu, hnatuan ringring a si ruangah liante cu border ih rawl ei cih ding in kumkhat sung rawlman a pek cih ruangah a can tete loah cun liante cu a vongtong dah tuk lo. Veikhat veihnih inn a ra tlun can ah an tong aw t’heu.
Nutluai cu hna ta rori a tuan. A taksa ih celhlo tiang hna a t’uan ruangah a nini in a t’awl deuhdeuh.
Liante, tete khal phurhar an t’heh zan a si thlang. Liante cu tuzan cu nunu tawn kan it tlang thlang ding tin phur tak in a puantawm cu a tuah, nuthluai khal ka fapa tlawng t’heh zan hrang ah ti’n Ar la thau t’ha zet a rak lei cia. A hnipuan neihsun zunthum sungih t’habik a hruk ih, a neih sun (sin kye) phanat a hri a cat ruangah puansia te thawi tuah mi a hruk ih, a fapa hmuak ding in a feh ve. An nufa ten an tonawk cu an lungawi tuk ih an pawm aw. Liante cun, nunu na dam lo maw na va t’awl ve. Na mit tang tla an dum t’heh nunu na dam lo si ko. si bawi hnen kan feh ding a hon ti.
Ka fa, dam lo sehla ka rong lo hmuak thei lo ding ra aw kan tluang ding khah tin inn zin an pam.

An nufaten ar cu an that ih a zan cu khohhran upa sawm in rawl ei khawn thlacamnak an nei. Zanriah khawh khua a thim zik mermo thlang liangte tei nufa cu thu nuam an rel.
Liante in nunu tu in cu keimah ka lo cawm thlang ding. Tusun ni tiang in cawn ih ka t’ul mi an hai lo teih I tuah sak ringring ruangah, ka lungawi tuk. Nangmah ve nu ka lo nei hi cu leitlunah mi vant’ha bik ka si. Nu, kan sayakyi pa nih( sawng hmu) t’uan ding in in ti si.
Liante thusim mi cu sang tu a neih lo ruangah liante cun a nu cu a hei zoh ih , a nu cu tha nei lo ti theih emem in a rak sing rero. Nunu, tuni na bang tuk maw? Maw, na dam t’ha lo saw? Tin a nui caal a hei tham sak cu. A caal cu a ling in a ling. Liante thinphang tuk ti ngaihnak thei lo cuh a biang par ah a mitthli an rong luang kiahko. Ihkhun parah a nu cu a hei cawi ih, puansia ciar thawn a caal cu a dip sak rero phah in” Bawipa ka nu hi damnak in pek sak hram aw tin thal a cam phah rero.
Caanher pakhat sung hrawng a hngak nan a nui taksa cu rehlam a pan thei lo ruangah a zanzan in vankautlang ih zato innpi a pan pi.

Zato innpi an thlen veten si an dawt ih, Glucose an thun cih. Liante cu Doctor pa in a ko ih, ka fapa, na nu hi Operation khal ih dam thei ding a si nawn lo. A natnak a tam tuk zo bak ah a natnak a rei tuk zo. Kan nih in ti thei mi kan neih nawn lo ruangah thaizing ah innah na tlunpi thei. In ngaihthiam aw tin Sibawi pa cun a suah san.
Liante cu khawvel tleunak khal a hmu nawn lo. Leitlun ih a nu hmel a hmuh nawn lo ding cu a ruat thei hrimhrim lo. A nu a zoh cu a mitthli cu vanrialruah bang an sur. Canher hrek hnuah liante nu cu a mit a hon meng tento. Ka fa, liante ka lo dam pi rei nawn lo ding curuangah nangmah leh nangmah ron enkawl t’ha aw maw.
Beiseinak a um nawn lo ruangah a thaizing ah innlam a pan pi. << peh lai ding >>

Leave a Reply